Christmas Spirit: Ang Kahulugan sa Pasko!
Philippians 2:1-11
Gerum O. Salatan

Hinapos pa lang ang bulan sa Nobyembre, ato nang madungog ang mga paboto, ingon man usab ato nang makita ang klase-klasing parol ug dayan-dayan sa matag-balay ug mga establisimento diri sa atong palibot. Taliwala niani, adunay usa ka pangutana nga kanunay pud natong madunggan ug mapatalinghogan: Unsa man gayod ang tinuod nga kahulugan sa pasko?

Daghan naga-ingon nga ang kahulugan sa pasko panaghigugmaay, pagpinasayloay, panaghini-usaay. Apan dinhi lang ba kutob ang sangputanan sa maong kahulugan sa pasko? Para kanako, ang pasko usa lamang ka simbolo ug pagrespeto sa pagkahimugso ni Jesus nga atong manluluwas. Alang kanako, ang pasko mahimong buhaton sa adlaw-adlaw.

Ang uban mo-ingon, maghigugmaay kita kay pasko na ra ba, maghinatagay kita kay pasko na, magpinasayloay kita kay pasko na…Mga igsoon, sa pasko lang ba diay nato kini pagabuhaton nga mga butanga? Ayha ra ba kita magminahalay kong pasko, maghinigugmaay, magpinasayloay kung pasko? Unya inig kahuman mag-inisnaba na dayon?

Isip mga tawo, bisan dili pasko, mahigugmaay kita, magkahiusa, magtinabangay, magpinasayloay ug uban pa. Bisan dili pasko, mamahimong buhaton natong hinlo ang atong mga kasingkasing, dili kay sa pasko ra kita magabuhat niini.

Bisan unsang adlaw, mamahimong atong mabati ang spiritu ug kahulugan sa pasko pinaagi sa paghatag, pagtabang sa mga nanginahanglan bisan sa dyotay lamang nga kantidad o sa bisan unsang paagi. Dili nato ikalimod nga ang atong nasod bag-o lang nahiagum sa nagkadaiyang unus sa kalikasan sama sa hagupit sa bagyo ug mga pagbaha ug landslide. Sa nianing sitwasyon, maghulat pa ba kita sa pasko aron mutabang sa mga biktima?

Sa matag-adlaw ang kahulugan sa pasko pwede natong ikinabuhi. Sa pagpakabana, pakiglambigit ug pakig-hiusa sa mga kalihokan nga naglangkob ug kalambuan usa ka pagpakita nga dili lamang sa pasko kini buhaton, inay sa matag-adlaw.

Buot kong ipakig-ambit kaninyo kining lima ka butang nga angay natong hinumduman:
P – agdayeg sa Dios, ug pagminahalay.
A – adlaw sa pagbag-o (positibong pagbag-o)
S – sadya apan adunay paghinuklog
K – kagawasan
O – Obedience, pagtuman sa kabubut-on sa Dios.

Mga igsoon kung adlaw-adlaw nato kining ikinabuhi, diba hapsay gayod ang dagan sa atong pagpamuyo. Ug kung ato kining ibutang sa atong tagsa-tagsa ka kasingkasing ug hunahuna ato gayod nga masiguro nga dili lang sa Diyembre pwede kita nga magminahalay, magbag-o sa atong mga kaugalingon, magsadya, makaangkon sa kagawasan sa atong mga problema kun dili sa matag-adlaw. Mamamhimo kini natong buhaton adlaw-adlaw. Kay susama sa gina-ingon ko sa unahan nga para kanako ang pasko simbolo lang diin atong gihatagan ug pagtagad ug pagrespeto ang pagkatawo sa atong Manluluwas nga si Jesu-Kristo. Amen.